P: Hello，Gmagazine嘅觀眾大家好，我係保錡啊。
G：最近推出咗第一首派台歌《猥瑣》，最想喺音樂上達成咩目標呢？
P：希望可以做啲香港人聽嘅歌，依家自己想做比較 POP 小小嘅音樂，可以多啲人聽廣東歌，依樣嘢係我目標。廣東話都係我哋母語，主要係想做廣東話嘅音樂。
G：同期出道嘅 Mirror 將會喺紅館開演唱會，你會唔會有飛？(講笑)
P：我冇飛啊（笑）。
G：ERROR會唔會都期望可以企上紅館？
P：都想㗎，因為有做過紅館嘉賓，望住四面台覺得好宏偉。原來紅館已經咁宏偉，如果去台灣嗰啲（體育館）件事就會再勁啲。當喺紅館面向觀眾，原來每一個人嘅樣都睇唔清。
G：咁你第一次企上紅館係咩心情？有冇腳軟？
P：我第一次係冇腳軟，因為我係搭火車過去嘅，喺大埔搭過去紅磡體育館啦，提醒自己要保持返最原始嘅心態，原來我咁「地底泥」嘅人都可以上到紅館表演。
G：之前有做過演員同主持，依家出咗新歌之後，多咗歌手嘅身份，你自己最享受邊種身份？
P：全部都享受，其實全部事都係有連結。因為有做主持或者演戲，咁先有機會可以唱歌，佢哋每一樣嘢都係連貫，所以每一樣嘢都要做好。
G：咁未來會想擺多啲時間同心機喺邊一方面呢？
P：我自己最鍾意就係音樂，但係如果全力專注喺音樂，就可能冇咁多人會了解我，所以我希望可以平衡到。綜藝、搞笑嗰方面同音樂兩方面都做得好好，演員就暫時未有適合嘅角色，如果可以做到張家輝「化骨龍」嘅角色，我就會全力去演㗎啦，但係如果要扮靚仔就唔好搞我住先。
G：除咗喜劇，會唔會有其他劇本都想嘗試？
P：其他劇本都可以試下《鎗王》，做下古惑仔都可以㗎，古惑仔嗰啲我應該出神入化㗎啦。如果我做大佬就麻麻地，做𡃁仔好啲，講多啲粗口。做大佬通常都係沉實穩重，大佬都有分好多種嘅，有「蔣生」，有「大飛」，如果做「大飛」嗰啲呢，我 OK嘅。
G：你依家面對負面評價嘅時候心態上有咩唔同呢？可能以前會被啲負面評論波動自己情緒，依家會點樣處理呢？
P：依家面對負面情緒就係冇依個想法，因為清楚自己做緊咩。例如你 serve 100 個人，冇可能 100 個人都鍾意你㗎嘛，所以依家嘅心態就係努力做好自己。因為其實喜歡同唔喜歡都係好主觀嘅，就算鍾意你嘅人都可以變到唔鍾意你，所以做好自己就夠。
G：你有創立自己嘅品牌LOST LIFE，品牌唔單單有服裝，仲有飾品同玩具，會點樣去定義自己嘅品牌？
P：自己嗰 Brand 就係一塌糊塗囉，做的好差，所以希望 2022 年所有嘢都重新做好啲，之後都會搵其他設計嘅單位合作。玩具方面就開咗另外一個 brand，淨係做玩具，依家會睇完好多物料、樣品、剪裁，之後先會做出嚟，唔會隨便出。
G：玩具係咪對你有特別嘅意義？點解咁鍾意玩具？
P：因為細個買好多玩具嘅，之後開始追夢就冇錢買玩具，依家有小小多餘錢嘅時候就會想買玩具。買買吓發覺，買不如做啊，見到有啲嘢好靚會想將佢變成玩具，所以就開始整 figure。以前玩具嘅物料上係空心囊膠，就做唔到太多可動嘅嘢，依家有新嘅物料，同埋好多唔同嘅模具，可以變成拆件，全部關節可以郁。咁就視乎你想做一件擺設定係畀細路仔玩嘅嘢。同埋上色方面嘅嘢都了解多咗，例如絨毛比較難上色，所以玩具方面全部嘢都要了解。我唔係想呃人錢，因為藝術品係睇你嘅細節，有幾多心思係裏面，人地先會尊重你。
G：如果有得揀，會唔會想繼續做諧星？定係想做偶像派？
P：我全部都想做，唱歌嘅時候就做返一個唱歌嘅保錡，諧星嘅時候就盡力去做一個諧星，因為我覺得依家娛樂圈係幾好嘅，有唔同方面、唔同類型嘅人都可以喺自己嘅崗位做好，幕後都可以做到明星。如果我淨係出歌，我一定做唔到歌手，一定要綜藝、搞笑全部都做。
G：喺追夢路上做過好多唔同嘅工作去支持你嘅夢想，咁你做過最辛苦嘅工作係咩呢？
P：中學做過一份工作係去剷屎，喺化糞廠剷啲屎落嗰池到。雖然人工都好高，有 $2,000 蚊一日，但係我做咗一日就頂唔順唔做了，因為嗰隻臭係沖完涼一個禮拜都仲有「屎味」。
G：出咗社會之後，有冇邊份工作印象比較深刻？
P：有份工係幾深刻，因為佢 remind 咗我好多。嗰陣時做 event 侍應，$1000 蚊一日，有一次係太陽娛樂嘅首映，見到好多明星，有見到陳蕾、小肥，咁依家同佢哋都變成朋友。依份工作就 remind 我：人嘅出處係冇乜所謂，只要努力就一定可以做到某啲成就。
G：有冇試過被人睇唔起？
P：日日都被人睇唔起嘅，其實睇唔睇得起都係取決於自己，多數人都睇唔起（我）嘅。
G：你覺得有依家嘅成就，運氣同努力各佔幾多成？
P：幸運就佔 99% 嘅，做咩都好，最緊要就幸運姐，但係一定要勤力，因為如果唔勤力就唔會有好彩出現。就好似買六合彩咁，啲人成日話自己唔中六合彩，點解呢？因為佢哋都冇買，又點會中。
G：會唔會都多謝自己喺追夢路上一直堅持參加比賽？
P：都開心嘅，堅持完好有成功感，原來堅持真係可以有啲嘢回報，覺得可以警惕大家，做乜都好，最緊要堅持！全民造星都係我最後一個比賽，如果唔成功我就去仲民度賣衫或者去 shisha bar 做 waiter。
G：大家可能淨係見到鏡頭前嘅光鮮亮麗，睇唔到背後嘅你，你最欣賞自己背後邊一點？
P：我最欣賞自己堅毅不屈嘅精神，因為依個堅持嘅精神同努力嘅態度係好難可以突破到。每個人都有一隻懶惰嘅魔鬼，如果你贏咗隻魔鬼，好多嘢就唔同咗啦。
仲民提問：
GM：如果再有人話你似八兩金，你會唔會嬲？
P：唔會，因為八兩金靚仔過我咁多，我係直頭痴咗八兩金光，如果冇八兩金前輩嘅話，直頭冇人識我添啦。
GM：你有提過想提名八兩金成為「全球百大型男」係咪真㗎？
P：係真嘅，因為我覺得我自己都可以入到「百大」嘅話，同埋我經紀人阿濟都可以入到「百大」，其實八兩金前輩係必須要入囉。
GM：有網民就形容你係「MK仔」啦，你會點樣回應呢？
P：我係「MK仔」囉，「MK仔」其實係幾好，因為香港有「MK」旺角依個地方，可以做到「MK 仔」代表我係香港人囉，我都感恩自己係一個香港人㗎。依家好難做一個地道嘅香港人，如果被人叫做「MK仔」就係純粹嘅香港人啦。
GM：相信大家都對你嘅感情生活好有興趣，你依家嘅愛情觀係點呢？
P：愛情觀就非常之好啊，我就想努力買到層樓啦，因為仲有段距離，咁拍拖嚟講就買唔到樓嘅，因為可能要行街睇戲食飯啊，所以就專注喺搵錢同努力工作方面就最好。令到屋企人嘅生活可以更加好，阿媽可以早啲退休，就係我想做到嘅嘢。
GM：姐係買到層樓之後先會開始拍拖嘅？
P：人係貪心嘅，當買完第一層樓就會想買第二層，買完第二層又會諗住買第三層，所以最後可能都係未拍住。
GM：姐係你會孤獨終老啦？
P：未知，有機會遇到嘅時候先諗，依家係冇機會遇到。因為好明確自己目標係努力做嘢，分唔到心去拍拖。
GM：喺工作上會唔會認識到異性，可以有的發展？
P：娛樂圈成日都認識到異性㗎啦，望嚟望去都係同一班人。做咗幾年，就覺得（異性）都差唔多，靚女就係靚女囉，望得太多靚女嘅時候，只係望到靚女囉。
GM：鍾意靚女定係其他嘢？
P：我鍾意錢多啲。感情方面，靚就一定要㗎啦，但係要相處到囉，相處係一件好高深嘅學問嚟嘅。
GMAGAZINE MAY Feature 保錡《BACK》
Director @galaxyman
Photographer & Stylist @c.tszon @kizerot
Assistant @_dameno_c__ @jk.wong
Make up @deacori
Hair @harris_lai
Interview @keung.jai
Design @romance.isover
Wardrobe & Accessories @hbxhk
另有限定親筆簽名海報贈送活動詳情
請參閱 https://instagram.com/gmagazine.hk
-
想睇更多 Gmagazine 最新潮流資訊！？
► Follow IG: https://instagram.com/gmagazine.hk
► Subscribe Youtube: https://youtube.com/c/GMAGHK