[018] GMAG x YT 周殷廷「限」

GMAG 團隊將主題設定為《限》，限嘅近義詞「有限」「局限」「限制」，只要換個角度同想法，有限亦都可以變成無限，好似 YANTING 一直喺由有限嘅情況下證明自己可以有「無限」嘅可能性，用行動話比大家知WHOISYANTING。

G: 首次個人演唱會有無咩突破？

Y: 最大突破就係我自己會擔任演唱會嘅創意總監及導演，我相信好多人會覺得做歌手有人嚟睇表演已經好開心，但我貪心，相信熟悉我嘅人都會知道我想比更多唔同層次及感受每一位入場嘅觀眾去明白我係用咩角度去睇或聽。

-

G: 曾經退居幕後成就今日嘅 YT？

Y: 我絕對認同，其實好多時我地向前行，我地感受唔到身邊嘅事，行得太快，根本咩都睇唔到。

因為唔係喺我控制嘅範圍之下，我被強迫停低，停頓嘅時候好痛苦，我會諗點解會喺我身上發生？我做錯啲咩？正正因為停低，我先睇到自己究竟係一個咩人，究竟我做咗咩，又無做啲咩，點先可以做得更好？我之前拍過一個作品叫《日出時讓街燈安睡》，裡面嘅主角其實就係我，講緊就係喺一個混沌嘅世界裡面，我不斷去拼搏，我明白到回歸自己嘅時候，我地每一步向前行，唔一定係最快，有陣時我哋要停低。

其實插秧係倒插先係最快，當你倒插秧時再去感受風，你先可以搵到屬於自己嘅方向。

G: 三部曲後，仍然願意接觸愛情題材？

Y: 會，但睇法會唔同，我成日聽人講「HOW DOES ART IMITATE LIFE , YOU MUST FIRST HAVE A LIFE」，所以每個藝人隨住成長，講嘅 TOPIC 都會唔同，我絕對會我探討呢樣嘢，令到大家更加認識而家呢一刻嘅我係點，我嘅睇法係點，然後透過音樂再去比大家去感受。

-

G: 三部曲成功後，之後嘅創作會唔會有壓力？

Y: 我覺得睇你點樣去衡量進步，以今次為例，觀看次數同辨識度都好好，但可能下一次我嘅作品唔係向大眾，而係喺我自身嘅技能或者藝術上嘅挑戰，我就唔可以用同一把尺去計算，同埋我覺得作為一個藝人，從來都唔可以靠流量去得到更高嘅 KPI，咁樣會令藝人更加局限自己方向，會變咗向 KPI 而生，唔係為自己嘅藝術而生。

G: 下一個作品，有方向？

Y: 有，已經錄製緊，希望大家敬請期待

-

G: 日常穿搭必備單品？

Y: 戒指，因為我手上嘅戒指唔只係飾物去令穿搭更好睇，而係每一隻戒指對我嚟講都有好大意義，其中一隻係我自己整比自己，全世界只有一隻，佢係北斗星，喺古時導航係要靠北斗星帶領我哋去目的地，無論喺幾大嘅海當中，你都要搵到自己嘅方向，爭取屬於自己嘅嘢，除咗呢隻戒指之外，每一隻戒指都不停提醒我應該要點做。

-

G: 擇偶條件？

Y: 我鍾意長頭髮嘅女仔、唔好粗魯，我最介意粗魯，其餘嘅都無特別要求。

G: 有幾多件黑色 TEE ？

Y: 超級多，同一件黑色 TEE，我大約會買 20 件左右，我唔太鍾意每日諗點襯衫，所以我大部分都係黑色，有人會以為我有花心機去穿搭，但其實我從來都無襯過，可能已經搵到自己想要嘅風格，所以更加唔想浪費時間去襯衫。

-

G: 你係咪一個自律嘅人？

Y: 我係，自律對我嚟講好重要，因為熱情唔係經常有，有人同我講我去唱片公司自薦，由朝做到晚，好有熱情，NO，呢個係自律，係講緊你明知道過程係痛苦，呢樣嘢會為你好嘅，而且係你需要做嘅，你只可以忍受痛苦繼續努力。

我最唔鍾意就係做 GYM，但我每日第一件事就係做 GYM，因為我完成一件我唔鍾意嘅事，而我克服到，代表我嗰日已經贏咗第一步，而我要贏第二或第三步就更加容易。

G: 有無新範疇想嘗試？

Y: 我嘅新歌就係我最想嘗試接觸嘅新範疇，係我從來無嘗試過嘅曲風，我自己都唔知最後成品會變成點。

-

G: 邊個係你嘅榜樣？

Y: 我有好多唔同嘅榜樣，我會喺唔同人身上抽取值得學習嘅地方，因為三人同行必有我師，而唔一定係一個人代表哂所有，每一個都可以成為我嘅榜樣。

G: 如何用有限嘅資源做無限嘅可能？

Y: 從來有限或無限嘅資源都可以做到無限嘅可能，重點係睇你點樣運用，當你覺得自己被限制，你就已經限制咗自己，當你覺得無任何限制，會有唔同嘅心態，當你有無限啲資源，你就會諗自己大把嘢可以輸，但當你只有有限嘅資源，你已經無嘢可以輸，亦都唔會有枷鎖，唔好比諗法限制你自己。

-

想了解更多訪問內容？？？
請登上 GMAG YouTube了解更多
https://www.youtube.com/@GMAGAZINEHK

GMAGAZINE [018] 《限》 @whoisyanting

Director : @galaxyman
Photographer : @c.tszon @kizerot
Video : @ethan_sien @wayinfoto
Studio : @gmag.studio
Stylist : @iimmhn
Make up : @danielmakeupartist_
Design : @romance.isover
Wardrobe : @aenrmous @rickowensonline @drmartensoffcial @gcdswear

#gmagazinehk #gmaghk
#限 #周殷廷 #YT
#YT大哥 #yanting #三生有幸