2022/02 - GMAG x 謝安琪 KAY TSE「蛻變」 - 𝗚 𝗠𝗮𝗴𝗮𝘇𝗶𝗻𝗲

G：點樣喺工作、家庭、休息之間取得平衡？

K：成立咗自己公司之後，有自己團隊協助，所以當我需要休息嘅時候，我想放慢就放慢。反而之前嗰種勞累係啱啱成立公司嘅時候，有好多嘢想做，逼自己喺好短時間做好多嘢，有種新階段開始嘅興奮，想每件事都衝到盡，但而家開始拎到平衡，亦都會根據自己嘅需要去調動時間。

G：「me-time」鐘意做啲咩？

K：我係一個幾悶嘅人（笑），通常會做屋企嘢，我享受做屋企嘢，因為屋企有好多咖啡器具，得閒就郁吓佢地，用布清潔吓，然後沖杯咖啡飲，可能一玩就玩成晚架啦。又或者成個下晝檢視吓自己嘅衫，襯吓衫，有時都會睇吓書，鍾意慢慢地做一件我覺得享受嘅事。

另外，因為疫情期間少咗出街，多咗時間同屋企嘅老人家相處，有時仲會突登揸車去搵爸爸傾計。

----------------------------------------

G：享受將生活上嘅細節做好？

K：係呀，近年好多人都會斷捨離，其實斷捨離係可以好好檢視自己嘅生活細節，將生活細節重溫一次，然後再整理，生活中真係唔需要咁多嘢，清減啲之後又係一個新嘅階段，令我越嚟越認真去對待自己嘅生活，所有嘢都可以放輕鬆，慢慢去做慢慢去享受。

G：由出道到而家入過唔同既公司，最近更成立咗自己公司「淺白本部」，心態上有咩唔同？

K：好得意嘅，我由出道到而家都係喺比較小型嘅公司，我出道就係 Ban Ban Music ，成間公司有好大部分時間都係得我一個歌手，調返轉嚟講，就係一個歌手支撐住一間公司，所以我都幾習慣喺啲人事簡單嘅公司工作。而家嘅感覺唔係好大分別，好多嘢已經有自己嘅經驗同睇法，所以呢種工作模式好啱而家嘅我。

----------------------------------------

G：可唔可以簡單介紹一下點解叫「淺白本部」？

K：「淺白本部」個「本」字好緊要，自己成立咗公司再做音樂，感覺係好似做返原本嘅我，我出道嘅時候，大家覺得我係嚟自好小眾嘅公司，咁多年嚟都唔係主力去做好「commercial」嘅作品。舊年同樂壇比較新嘅單位合作，被稱為「主流」同「非主流」嘅合作，我就諗「咦？原來我而家係主流」，我終於被大家確立咗係歌手啦。其實我一路都係以「indie」嘅心去做音樂，而家都係一樣，呢個係我嘅「本」，而「淺白」係一種心態，喺呢個好璀璨、好繽紛嘅行業，專心做好自己就夠啦。

G：之前訪問有提過，嚟緊有能力都想簽一位新人，咁會有咩標準呢?

K：其實呢件係我入行以嚟一直好想做嘅事，因為啱啱入行嘅時候，周博賢將佢嘅音樂知識、資源，好專心咁幫我發展，睇落好似公司淨係推一個歌手咁，但係呢件事對我嘅人生、事業、咁多年嘅音樂路都好重要。能夠認真、專注培養一個新人嘅態度我覺得好美麗、好有溫度。
希望「淺白本部」都可以利用我地做音樂嘅經驗同「network」去培養一位新人，而我無一個特定嘅標準，因為我相信緣分會令我遇到。

G：經歷過唔同身份，做過老師、歌手、演員，而家開自己唱片公司做埋老闆，你最享受邊種身份?

K：我覺得每一種都好好玩，前幾日先同舊同學傾計，佢地都有試過打工、自己創業，全部人都有自己鐘意做嘅嘢，所謂「生意」未必揾到錢，但係可以發揮自己嘅專長，所以我地不約而同認為好難稱自己為「老闆」，我地只係鐘意追尋自己夢想嘅人。

----------------------------------------

G：咁係咪為咗成功感、滿足感？

K：係呀，而家有自己好親密嘅團隊，我地嘅溝通真係好好，我好多謝佢地，佢地同我一齊處理好多藝人以及初創公司起步需要面對嘅事情。加上呢兩年有好多大環境嘅變動，例如 COVID，各行各業都受打擊。所以能夠喺呢個情況吓開新公司，有自己嘅團隊，有目標，呢份感情好青春，我好珍惜佢地，我好喜歡我啲同事，能夠做到咁係我嘅福氣（笑）。

G：點解會成立 Kaytiquette ？品牌既設計理念係咩?

K：Kaytiquette 係我嘅生活札記，我地有一個小小嘅website，暫時有服裝嘅聯乘，同我鐘意嘅設計師朋友，做咗一啲唔同嘅collection，每一次都想表達唔同嘅意思。例如，第一次聯乘係想大家喺生活上面搵小浪漫、第二次嘅聯乘就係想大家可以放下工作，偶爾俾自己同靈魂共舞，搵返內心最想做嘅嘢，然後不顧一切去做自己鐘意做嘅嘢，捉住小小嘅情緒同感覺。

----------------------------------------

G：嚟緊 Kaytiquette 嘅發展方向係點？

K：其實Kaytiquette嚟緊都會有服裝以外嘅聯乘，有其他唔同嘅企劃，令我好期待。我認為除咗音樂之外，平安都好緊要，我覺得而家做嘅嘢就係呢種概念嘅伸延，想話俾大家知我好好咁生活緊。唔一定要做啲好大嘅項目，可能只係生活裏面好細嘅東西，令我覺得過咗一個好開心嘅下晝，咁就已經值得我去做，然後我仲會記錄喺Kaytiquette呢本書仔度。我有好多嘢都唔識，譬如服裝，一直都唔係我自己專長嘅範圍，但工作關係，都會識到好多設計師，自己對服裝亦都感興趣，所以呢個係Kaytiquette一個起步點。